踩過界做法律節目 蘇民峰有籌碼挑戰自己

        一向主持風水節目的玄學家蘇民峰和「妹頭」主持有線新節目《中伏》,講解市民在不知情下所做出嘅違法行為,每集邀請法律界及藝人出任嘉賓拆解中伏事情。問到為何要踩過界時?他大笑說:「o依家我唔再做玄學節目啦,講風水合埋眼都識做,我反而好想挑戰吓風水以外,自己到底仲可以做到乜?」他更揚言,只要遷就到他下午開工,拍劇、做舞台劇來者不拒。

        之前蘇民峰請來朱慧敏(Queenie)、劉雅麗(Alice)及向海嵐(Ann)擔任嘉賓,講到中伏經歷,Alice自爆曾遇上電話騙案,幸而機警無中伏,她憶述說:「有次我收到個來自內地嘅電話,對方操廣東話問:『你估吓我係邊個?新加坡嗰個呢?』咁啱我真係有個咁嘅朋友,就隨意問『點呀Stephen?』佢回答『係呀,聽日我會落嚟同你食飯呀!』翌日我再接到同一個手機號碼,對方竟訛稱喺深圳夜店畀人拉咗,叫我攞6萬蚊去保釋佢,我愈聽愈覺得可疑即大耍太極話:『呢排我要返工排戲唔得閒喎。』點知騙徒仲死心不息,叫我喺返工附近搵間找換店匯錢,最後我話附近冇呢啲店打發佢。

唔再借錢畀朋友

  後來我好奇打畀朋友了解,朋友即否定說:『傻架,Stephen?好有錢㗎,佢要借唔會問你借咁少!』真係一額汗。」

  經此一役,劉雅麗唔再接陌生人來電,她會飛上留言信箱再跟進,蘇師傅都點頭讚好,他說:「我都唔聽呢啲來電,有重要事會留言㗎啦,留言都唔留搵我有鬼用咩!從相學角度睇,朱慧敏個樣雖然惡,但最純係佢,最易被騙;Ann最好彩最受人保護,好少人捨得呃佢,最醒係劉雅麗,佢唔係鱷魚頭老襯底,做人做得耐俾人呃多自然會醒啲!正如我都幾蠢俾人呃到30幾歲,前後惜過60幾萬,其中有學生問我借1萬元買機票移民加拿大,但就一去冇回頭,我係佢師傅,佢交咁多學費,又成日介紹客畀我睇風水,真係唔明佢心態,不過借錢畀人預咗9成冇得還,依家我話啲錢投資晒喺股票度都唔再借。」

採訪:方騫平

hd