同老婆睇完戲食個Tea 70歲秋官風騷舉V

        今年秋官好威水，因為70歲嘅佢喺香港開完紀念入行50年演唱會後，再移師澳門舉行，同時又喺內地拍攝古裝劇《將夜》，有心有力當然繼續做。日前下午，終於得閒嘅秋官同老婆去金鐘太古廣場睇戲，散場後有啲餓就去食個快Tea，尾聲時鄭太發現記者就戴超行先，同記者舉晒V打招呼嘅秋官轉頭會合。

        秋官喺12年拍完TVB 劇《心戰》後，相隔5年再拍內地古裝劇《將夜》，改篇小說嘅《將夜》屬玄幻劇，小說中嘅夫子一角就由秋官演出，其實唔知劇集講乜，但一頭銀髮嘅秋官的確好有型，其餘唔大興趣。

風騷伯伯愛戴賊仔帽

　　日前，終於忙完嘅秋官同老婆去金鐘太古廣場拍拖睇兩點半，散場五點幾，食晚飯又太早，嚟個輕食Tea最好，鄭太負責點菜，秋官負責食多啲，兩人坐咗半個鐘，傾偈唔多，秋官掛住撳手機，鄭太掛住周圍望，突然間發現記者嘅佢有少少愕然，然後同秋官講兩句，佢就戴番副超行先，戴至愛賊仔帽嘅秋官就殿後，見到記者先舉V再豎起手指公，個樣勁風騷。

採訪:李維隆