人父童心未泯 李泳漢帶「蛋黃哥」遊街

        近年做咗廚神又開埋私房菜嘅「鼎爺」李家鼎,人氣勁旺帶挈其兒子都多人留意咗。日前下午,鼎爺大仔李泳漢一支公現身銅鑼灣。見佢去SOGO買零食,之後行去世貿中心悶遊,右手吊住個蛋黃哥八達通吊飾,估唔到大大隻嘅佢,原來童心未泯喎!

        打得、騎得、煮嘢更有一手嘅鼎爺,憑大台節目《阿爺廚房》展示收藏多年、出神入化嘅廚藝,獲網民捧為新一代「廚神」。煮出一條財路嘅鼎爺月前更開咗間「鼎爺私房菜」。開幕禮上,鼎爺紅顏知己「李師奶」更帶埋其女兒和孫女到場,加埋一對孖仔泳漢和泳豪,「一家人」熱鬧撐場。鼎爺仲透露booking排到明年3月,生意好好。

食零食悶遊

  老竇做到無停手,日前下午,37歲嘅李泳豪就好得閒,身邊唔見老婆嚴佩鈺(Conny)和約一歲半的兒子Alfie,一個人孭背囊行吓街。童星出身嘅泳漢,愈大愈脹,高大又橫向發展。見佢先去SOGO地庫超市行圈搵食,買咗嚿草餅邊行邊食。唔使三啖狼吞咗手芯咁大嘅草餅,然後走入便利店買支凍茶,好方便咁用箍喺右手嘅蛋黃哥八達通嘟機畀錢,再行去世貿中心window shopping。其間,脹爆泳漢經過間首飾店停低望吓啲鑽石戒指、手鏈等,似想買禮物送畀愛妻喎。

採訪 : 梁志明

hd