粉絲心意永久保存 陳柏宇望用作家居裝飾

        7月成為人夫跟模特兒符曉薇(Leanne)成婚的陳柏宇(Jason),最近忙為12月舉行的首個紅館個唱《陳柏宇Speechless演唱會2017》宣傳,更專登搞活動「圍你四面台」跟粉絲互動。原來Jason除了對老婆好,其實都很錫歌迷,一直有保留他們寫的書信,更計劃未來用作家居裝飾永久保存,聽見都冧啦!

        為了演唱會跟歌迷有更多互動,Jason專登搞了一個「圍你四面台」活動,希望歌迷將心意寫在磚頭上,到時放在台邊為他打氣,「可惜過千塊磚已畀歌迷攞晒,所以搞咗個社交平台畀大家留言,不過o依家真係未有時間細睇。」

愛心湯心意搭夠

  以為Jason對粉絲咁無心肝,原來他只是想慢慢嗒,「我好鍾意留番嚟慢慢睇㗎!入行10年嚟Fans畀我啲信,我全部都有留低晒,擺滿咗幾個儲物箱啦!我諗住第時喺自己間屋將全部擺晒喺塊牆度裝飾,當然間屋大啲咪放得多啲囉!今次我都諗住開完騷搬番啲磚走,用嚟將來起屋用,咁咪可以永遠保存囉!」剛新婚的Jason,原來太太都有為演唱會出力,「佢有煲愛心湯畀我,但係佢唔識冚蓋,咪要不停加水,所以唔算好飲,但勝在心意搭夠啦!哈哈!」不過開騷時,Jason不需太太操勞在後台幫手,「我鍾意佢專心做觀眾,同埋佢啲意見比較主觀,都唔會攞嚟參考㗎啦!」

撰文:杜淑霞

攝影:袁東亮、謝民光 場地:Palco Ristorante(2618 8383)

hd