鬧市拍劇無人認得 馮盈盈風騷撩仔

        16年港姐冠軍馮盈盈,早前首次正式拍劇,拍住甜美人妻岑麗香參演新劇《果欄中的江湖大嫂》。日前周日晚上,盈盈和黃嘉樂現身九龍城拍外景。當日,盈盈化咗個「豬頭妝」喺人來人往嘅大街出現,全程無途人認出,於是索女就成日撩對手和成隊男crew吹水,笑吓hea吓,好快收工。

        23歲嘅馮盈盈當選後,火速被爆曾在個人網誌爆粗,被封「粗口港姐」。盈盈早前和「十優港姐」、15年冠軍麥明詩主持無線節目《#後生仔傾吓偈》,其出位言論,被外界批評說話低俗意淫有損港姐形象,幸好拍檔麥明詩出口力撐。

唔使顧儀態

  日前周日晚上,盈盈穿上鮮紅色衫現身九龍城拍新劇《果欄》,戲中角色性格粗魯嘅佢塊面化咗受傷妝,成面傷痕又膠布,似被人打到豬頭咁。傷痕纍纍嘅盈盈繞住劇中胞兄黃嘉樂,一邊行一邊撒嬌。一個簡單鏡頭,幾句對白,二人拍了三take就火速收工。其後,兩位演員緊張睇playback,見導演收貨,才放下心頭大石,笑口吹水。而好多途人路過,望兩望都認唔出盈盈和嘉樂,只係細聲話「邊個嚟O架!」搞到兩位當事人有啲尷尬。咁仲好,無人舉手機偷拍,盈盈可以做番自己,唔使顧儀態,不時風騷撩工作人員傾偈,又可隨意大笑,幾自在都有呢!

採訪 ︰ 李維隆

hd