開棟篤笑演唱會 肥媽黑妹預告大爆圈中人笑料

        去年宣佈退休唔再喺香港開Show嘅肥媽短時間內復出,同老友黑妹(李麗霞)下月假伊館舉行兩場《黑•媽媽笑住唱演唱會2017》。63歲肥媽否認食言:「去年先至話唔唱,今年咁快又唱番你估玩咩?只因當時Joe Junior唔舒服,可能要休息一段好長時間,但個場又Book咗,老公見黑妹姐求救無門,主動叫我幫吓手,所以今次係為朋友,並由Joe Junior間接『成就』咗好事。」

        今次係一個笑住唱嘅演唱會,以半棟篤笑、半唱歌的方式演出,有點似夜總會中歌者跟觀眾嘅互動及交流。黑妹姐原意係開雜錦Show攝場,但肥媽老公覺得棟篤笑演唱會較有新意,就叫肥媽不如試做,反正又未做過,當係挑戰吓自己。黑妹大讚肥媽永無托手肘,係個有情有義嘅好朋友。

  肥媽說:「o依家香港人最緊要係開心,一眾搞笑能手喬寶寶、陸浩明、農夫及羅敏莊等都會撐場,甘願做下靶搞笑位!到時兩個阿婆同後生仔女對決都好搞笑,應該會好有火花。而且我哋有好多關於圈中人嘅笑料,只要無傷大雅,得啖笑嘅都可以爆吓,一係唱吓平日少唱嘅《打雀英雄傳》同《雪中情》都可以玩足4個鐘,仲係笑到肚痛嗰隻。」

  肥媽又率先爆,指失婚黑妹在美加等地都有追求者,裙下之臣好國際化:「係美國登台時個贊助商追得好熱烈,又送貴價高球棍又請食飯,更會照顧埋我哋登台嘅使費,真係好細心,我好鍾意呢個做未來妹夫,不過黑妹就cool到爆,連我老公都睇唔過眼叫佢溫柔啲。

採訪:方騫平

hd