銅鑼灣蕩失路 蕭芳芳千辛萬苦買染髮棒

        因為耳疾影響,70歲嘅蕭芳芳好多年前已息影,只專心搞護苗慈善工作,近年仲要湊孫,時間唔多夠用,所以每次出街,芳芳姐都拎住個小型紅色行李箱,有嘢要買一次過,唔使煩。可能年紀大咗記憶力差啲啲加上超多自由行,人多車多又路窄,所以芳芳姐喺銅鑼灣蕩失路,喺Sogo行去皇室堡都要問人。

        當日晚上八點,一頭銀髮,戴住太陽超嘅芳芳姐,拎住手拉行李箱獨自現身Sogo附近,見佢左望右望一頭黑人問號唔知點算,然後見佢問一個後生仔,對方指一指某方向,然後芳芳姐就開心咁向住目標行,行近世貿覺得唔對路,芳芳再問一保安員,原來之前個哥仔點錯路。

染髮好重要

  千辛萬苦終於去到皇室堡,但芳芳姐上樓前都要問一問員工,Make Sure先上樓,究竟芳芳姐要去邊?答案係莎莎。原來芳芳姐好需要買一支白髮補染棒,即幫髮根補色之用,見佢一去到就知補染棒所在位置,明顯買開,之後再去買迷你指甲油,11蚊一支,19蚊兩支,芳芳姐揀咗幾支就去畀錢,然後拉住行李箱嘅佢好有型咁行去搭的士離開。

採訪︰梁志明

hd