成功減肥回勇見曲線 湯寶如紀念Show晒成果

        昔日「寶麗金小花」湯寶如(湯記)主持TVB《流行經典50年》名利雙收,頻頻登台吸金,下月15日更於Star Hall開入行25周年紀念Show。成功減肥至110磅,三圍回復做女時嘅33C、23、33,問湯記開Show係咪會晒身材益觀眾?她大笑賣關子:「唔知㗎,最緊要時尚,型同靚。」不過,湯記自爆男友陳德民唔主張佢性感登場,咁今次湯記咪即係作反?

        湯寶如即將舉行一場《獨愛音樂25周年演唱會香港站》,她形容今次係突如其來的安排,因為公司book晒場,紅館又未爭到,咁就順應安排,反正做細場冇乜負擔,又可以增加凝聚力同觀眾拉近距離,最重要係集體回憶,「因為一早答應同王馨平喺周慧敏演唱會再度合唱《美少女戰士》,所以我嘅show唔會有呢part,不過陳曉東、黎瑞恩仲有其他神秘嘉賓會助陣,肯定係有吸引力嘅。」

難忘當年全公司拍MV

  46歲湯記係寶麗金全盛時期嘅歌手,當年人多勢眾,寓工作於娛樂開心到不得了:「最記得全公司好似周慧敏、王馨平、張學友、草蜢、劉小慧、黎明、黎瑞恩同關淑怡拉隊去元朗拍《鼓舞飛揚》MV,宣傳人員抬埋麻將枱櫈去,我哋分組拍攝,唔使埋位嘅就打台灣牌,當年我真係好迷台牌,o依家有時間都陪屋企人啦。」

  湯記開show,男友煲湯水、陪佢做運動撐到底,她坦言雖然兩人分房瞓10幾年,但感情不變:「我哋有性有愛,做正常男女朋友會做嘅嘢,大家唔使戥我哋擔心,最緊要啱自己嘅生活模式啫,唔一定成日黐住就開心,我哋兩個之間係有共識嘅。」

採訪:方騫平 場地:MegaBox CEO


hd