抽空連體放閃 莊思明坐胞姊座駕拍拖放狗

        有11年駕駛經驗嘅莊思明(Lisa)日前不幸「炒車」,座駕Total Loss又周身瘀傷。發生意外當日下午,Lisa約咗男友楊明去大坑拍拖放狗。見素顏Lisa發現記者後不斷避鏡,反而男友就顯得大方。最後兩人登上女方胞姊莊思敏嘅Tesla座駕,車上仲有埋司機,輕輕鬆鬆走人。

        港姐出身嘅莊思明有樣有身材,年前拍《愛•回家》被楊明私有化後,二人不時公開放閃。早前,30歲嘅Lisa被影到與36歲嘅楊明連體睇樓,女方直認有同居打算:「想試吓一齊住,因為他經常拍劇,一齊住可以爭取多些見面時間。」

  咁又係,楊明被大台力捧上緊位,拍緊新劇《果欄中的江湖大嫂》外,日前又出席新劇《兄弟》嘅造型會,而Lisa就拍緊《是咁的,法官大人》,各有各忙,真係同一屋簷下先可以見多幾面。

「一家人」散步

  日前下午4時,拖友唔使開工就齊齊去大坑搵食兼放狗。短褲Lisa晒白滑長腿跟實男友,楊明就拖住送畀女友嘅三色柴犬Haru。雖然男方對狗毛有敏感,但為咗honey,都不惜親親小狗,「一家人」散散步。見二人步履一致,好有默契。其間,兩人打算去茶餐廳食tea,惜茶記快打烊,二人無奈call司機轉場。未幾,司機駕駛Lisa胞姊莊思敏嘅Tesla座駕到場,車身掛上莊思敏英文名Jacquelin嘅頭三個英文字母好易認呢。

採訪 : 李權威、李維隆

hd