拍真人騷賺凸 星級B女改黐媽咪 鄭希怡帶梁浸浸開餐做萬人迷

        36嘅潮媽鄭希怡(Yumiko),早排帶埋兩歲半大嘅明星囡囡梁子柔(乳名︰梁浸浸),返內地拍攝《不可思議的媽媽》真人騷,掘金之餘仲令到原本較黐工人同婆婆嘅浸浸,變得好黐身,母女感情又再昇華。日前晚上,靚媽咪帶人氣囡囡去大坑與友人開餐,穿上花裙仔好cute嘅浸浸不時要媽咪抱抱,仲唔怕生保,好乖畀人又拖又抱。Happy gathering三小時,圈外友人輪流圍住萬人迷小公主「集郵」,樹熊寶寶任影唔嬲,冧死人呀!

        兩歲半嘅星級B女梁浸浸五官精緻,加上呆萌得意樣,網民超like,連媽咪嘅好友容祖兒、蔡卓妍姨姨等都係佢忠粉。近日,呢對香港人氣母女檔返內地拍真人騷《不可思議的媽媽》,有指Yumiko兩母女以一千萬人民幣北上掘金,節目上月尾首播,破億點擊次數,Yumiko同浸浸𠲖家人氣爆晒燈!

可愛娛賓

日前周六,Yumiko幫愛女打扮靚靚外出見朋友。當日晚上約7時,Yumiko一身運動look加牛仔褸和浸浸母女裝出巡。兩母女和外傭去大坑一間西餐廳與幾位圈外男女友人dinner。甫到場,束上半截辮嘅鬈髮小公主就主動與人揮手say hi,o氹到在場者開心猛笑。星B可愛娛賓,Yumiko見到囡囡賣萌都笑到腰果眼。席間,友人爭抱浸浸,又帶B女出門揀蛋糕、拖小手散散步等,小公主心情好靚唔會喊,不過一返入餐廳見番媽咪都要黐實最愛,攬實母親搵番安全感。一班人開心相聚三小時,臨走時輪流圍住小公主「集郵」,母親仲教愛女舉V,浸浸笑得好甜。最後,Yumiko丈夫Andy(梁學儲)較啱時間來接妻女,愛女見到daddy,即時化身樹熊寶寶撲向父親,小手又攬實至愛蜜蜂仔背包,眼仔碌碌的浸浸公主真係可愛到暈!

採訪 : 梁志明、李維隆

hd