考牌考上癮 方力申攞救援潛水牌

        37歲嘅前「飛魚王子」方力申(小方),早年已考獲急救牌、健身教練牌、電單車牌等,已有進階潛水牌嘅佢日前仲趁空餘時間,靜雞雞去報名考救援潛水牌。日前早上,落海完成埋最後一堂嘅小方順利拎到張證書,鬼咁興奮話:「有時去旅行潛水,有咩事幫到人又幫到自己嘛!」

        游泳高手方力申,投身演藝圈後亦無放棄佢愛水嘅運動,十幾年前已經考咗個初級潛水牌,潛落香港水世界後大讚,「好Surprise香港海底有咁多靚珊瑚和魚,好值得推廣。」之後仲考了急救牌、健身教練牌、電單車牌、船牌等,日前的起心肝考埋救援潛水牌,遲啲再考潛水長,有機會教人潛水O添!

  日前周四早上9時,小方隨教練Stephen(區紹堅)到西貢橋咀島考埋重要一堂。當日,小方和另外4男女學員成一組,先在船上做一part模擬拯救程序,然後正式落水,同組員分別拎住指北針、救生繩等潛落水「做searching救人」,小方認真完成後,正式獲頒「救援潛水」證書,佢興奮說,「我未入行已經跟Stephen學潛水,之後工作好忙,好少潛水,早幾年考咗個進階潛水牌,教練就成日催我考埋救援潛水牌,咁啱呢排留港時間多啲,配合到就快快手考埋,遲啲去旅行時都想潛吓水,海底好多嘢睇O架!」

採訪 ︰ 袁東亮

hd