相戀20年 凍齡單立文攬潮妻買Cake

  58歲的保鮮男神單立文(豹哥),近年被大台力捧劇接劇,升呢做「視霸」。日前下午,豹哥唔使開工陪愛妻胡蓓蔚去銅鑼灣拍拖更。當日豹嫂打扮靚靚,白色喱士top配個半圓形綠色手袋,型到爆。兩夫婦買完咖啡又買cake,然後去朋友度happy打躉,食tea過日辰。 採訪 ︰ 李維隆

  仲有年幾就「登六」嘅豹哥,外表唔識老,而佢睇起嚟好似冇厘正經、玩世不恭;不過做起嘢上嚟,其實好鬼認真。淨係講佢對老婆胡蓓蔚咁多年一條心,就知佢認真又專一啦!男神和honey拍拖11年,08年拉埋天窗,今年踏入結婚9周年,潮夫婦非常enjoy二人世界。

  O依家忙拍處境劇《愛•回家之開心速遞》做男二嘅豹哥,日前下午2時許同老婆去百德新街一大廈搵朋友,未幾恩愛夫婦送友人上車,就搭膊拍拖行去世貿中心。黑超豹嫂打扮花枝招展,星味十足。靚靚人妻獨自入agnès b.排隊買兩杯咖啡,之後出門口join番型仔老公揀西餅。兩公婆貼頭有商有量,買咗一盒西餅後,行返去銅鑼灣廣場二期搵friend,放假嘅日子係要同朋友聚吓舊嘅!


hd