陪長輩行街街 淡妝張曦雯依然吸睛

  2012年國際中華小姐冠軍,有打機女神稱號嘅張曦雯(Kelly)因為拍旅遊節目時又搏又索,吸納大堆雄性Fans,個個讚佢真,打機會爆粗,着泳衣又唔遮遮掩掩,是一名爽女神。日前下午,戴住Cap帽,化咗淡妝嘅張女神去ifc行街,雖然着住運動衫,唔惹火又唔嬌艷,但喺人堆中依然吸睛,最令人注視。 採訪:張詠森

  張女神之前出席樓盤活動,未持有物業嘅佢近年積極儲蓄希望可以喺香港置業,因為鍾意做運動所以鍾情有靚會所嘅新樓,健身室最重要,佢唔大想頭,600呎就心滿意足。不過佢都忍唔住呻,「幾辛苦做嘢都好似儲極都儲唔夠錢咁!」唔扮嘢,真心話。

女神陪伴日

  當日下午,張女神做完運動去咗Zara四圍行,佢無乜點睇衫,一直傾住電話喺店內不規則咁行,原來同行仲有兩個中年女士,女神係陪女士睇衫,明晒。

  行咗15分鐘就轉去行超市,女神買水,女士買麵包,買完就行去停車場拎車,女神負責揸車載女士離開。


hd