歌影強勢發展 睇過千呎樓上舖 沈震軒密謀開韓式跳舞學校

        近日強勢加盟「太陽娛樂」、會喺歌影兩棲發展嘅沈震軒(Sammy),日前晚上與一男友人現身銅鑼灣耀華街。見cap帽型男Sammy不時手指指望向對面大廈空置舖位,又查看手機,似乎想搵舖做生意喎!事後致電Sammy,佢大方話有意搞間Studio,他說:「想同跳舞老師一齊開間似韓式嘅跳舞學校,打造有潛質嘅訓練生。」

外形高大靚仔嘅Sammy,近年屢拍人氣劇,好似14年喺《使徒行者》飾演連浩勤(Kobe),同長腿天后陳敏之出生入死,令其人氣急升。不過靚仔早前閉關轉型,秘密地獄式谷肌,原來「爆肌男神」係ready簽約新公司後,會開行turbo接拍動作片。

  日前晚上10時許,戴cap帽一身便裝嘅沈震軒和一名男友人現身銅鑼灣耀華街。兩個大男人企定定打量緊對面勿地臣街15A座大廈,該大廈樓高9層,同時有街舖和樓上舖出租,見Sammy仰高頭睇不時指手畫腳同時查看手機,似睇緊樓上舖個floor plan,該舖建築面積千五呎,月租開價6萬。逗留十分鐘,兩男行去附近酒吧飲嘢,坐低繼續密斟。

  其後致電Sammy,佢正認搵緊港島區舖位,準備同合作多年的跳舞老師搞間studio培訓新人,Sammy話:「之前去過韓國學跳舞,嚟緊想開間似韓式、有系統嘅跳舞學校,收生學跳舞之餘,又會幫佢哋拍片接騷,有機會真正表演吓不過都要一步一步嚟。(咁忙仲有時間搞生意?)都係構思中,如果開到有老師睇住。嚟緊成年都會拍戲,o依家接咗四套戲,其中三部係動作片,所以都train緊。未來大計都會中、港兩邊同時拍電影和拍劇。」

採訪 : 李權威、李維隆


hd