為4騷1碟勁忙 AGA自認已習慣單身

        AGA(江海迦)最近推出新歌《Nights Without You》,講剛分手的女孩,還未適應單身生活,但她笑言要找回幾年前感覺才能演繹,因無拍拖多時早已習慣一個過日子。不過她又指近來就算有愛情出現,也怕沒時間迎接,因除了準備明年初的大碟外,還會連開4個騷,包括首次跟樂隊Supper Moment合作。

今次AGA創作新歌,靈感來自7、80年樂隊愛玩轉音,「嗰時啲樂隊好似Earth Wind and Fire同Kool and the gang,啲歌有好多轉音,我好想寫首睇吓可以轉幾次音,但原本寫英文Demo係講金錢與道德,好難得唔係情歌,點知寫成廣東詞唔係咁夾,自己都覺得好可惜。」

期待開騷

  談到適應單身日子,AGA笑言:「太耐無拍拖,已習慣單身嘅孤單啦!」不過AGA似乎唔多恨拍拖,因講到工作她即眉飛色舞,尤其是即將跟樂隊Supper Moment首度開騷《First date》,「以往成日喺活動度合作,但音樂上係第一次,嗰日一齊宣傳已經好好玩,到時應該會好有火花。」另外,AGA還會舉行三個小型音樂會,「三個騷嘅歌會有啲唔同,仲會配合Jazz或者文青主題重新編曲,希望歌迷會睇到我唔同嘅一面。不過呢段期間我仲要為新碟做多兩首新歌,所以真係忙到無時間覺得孤單㗎!」

採訪:杜淑霞 場地:The AIR(The ONE)

髮型:Gary Sun@Hair Corner 化妝:Elaw Wong@thelook-studio.com

hd