約友食茶餐好好傾 呂慧儀影食物有要求

  網上有好多分享平台,藝人為宣傳自己,乜都影一餐然後即Post上網,擦存在感好重要。有藝人post嘢好無質素,但呂慧儀算係肯用心。日前傍晚,化行妝嘅佢約Model老友去食茶餐,見佢影住自己倒汁落食物嘅動態,動感Gif無咁悶,識玩吖。 採訪:梁志明

  拍緊無線處境劇《愛.回家之開心速遞》嘅長腳蟹好鍾意拍處境劇,因為拍攝時間穩定,長腳蟹就話:「我朝早仲可以送埋個仔返學先返工,收工又趕到返去同佢食飯。」同返寫字樓無分別,難怪佢比較易約朋友聚會。

茶餐廳短叙

  當晚6點,一身白嘅呂慧儀同Model老友喺銅鑼灣翠華食嘢,前者叫咗一個茶餐,又包又有麵,手長腳長嘅佢自己食咗九成,其餘分咗啲畀朋友。食嘢其間,佢不斷講嘢,表情極多,疑似幾耐無見,食咗45分鐘就埋單走,一出餐廳,講住電話嘅長腳蟹發現記者,揮揮手打個招呼,真乖。


hd