孻女愛「薯版坤哥」 秋官女鄭詠曦初戀甜蜜蜜

 現年70歲、有5億身家嘅美魔男秋官(鄭少秋),今年舉行入行50周年演唱會,跳得唱得有心有力。家庭方面,多年前其狂野大女詠恩溝仔戰績彪炳,做過一排星二代風頭躉!而好少露面嘅細女詠曦,乖巧文靜,打扮樸素,近年亦開始搽唇膏,原來24歲女私藏咗個「薯版坤哥」男友。日前晚上,紅唇詠曦和年紀相若嘅四眼男拍拖行銅鑼灣,「薯版坤哥」更連續5次甜吻小女友,二人初戀mode勁sweet!

        提起秋官女,好多人會諗起現年26歲嘅大女詠恩,皆因早熟詠恩戀愛大過天,經常換畫攬仔啜仔,好鬼豪放。2015年,有指英國大學畢業回港嘅詠恩於太子大廈Ralph Lauren任職店經理,與澳洲籍男上司L先生過從甚密,感情生活keep住多姿多采。相比起雜食胞姐,24歲嘅詠曦完全兩個type,衣着樸素密實,好純好乖,早年有報道指在大學讀生物醫學二年級嘅詠曦未拍過拖。

  日前晚上8時許,大個女嘅詠曦首度拍拖斷正,小情侶外形匹配,似係同學升呢變puppy love。髮型、樣子似媽咪、高瘦身形就似足daddy嘅詠曦,當晚紅唇薄妝會男友。詠曦和「薯版坤哥」齊齊孭個運動型背囊十指緊扣行時代廣場sasa揀潤唇膏。見詠曦並非一般港女,拎出銀包ready畀錢,但小男友好錫女友,即時掏出一百元找數,詠曦甜入心,冧笑好靚女!

連吻五次女友

  其後,「薯版坤哥」拖實詠曦漫步返女友寓所。沿途拖友不時打情罵俏,超級溫馨。估唔到「坤哥」外表老老實實,冧女有一手,佢趁等過馬路時,挨近女方耳仔然後偷吻,見詠曦勁冧,仲連吻五次,冧到女友甜笑撒嬌,將頭挨向男友膊頭,然後做連體嬰行番禮頓山。臨走時,詠曦發現有記者,一向低調嘅佢驚青同男友通水兼搵對方遮樣,最後兜個大圈行側門返家。

採訪 : 梁志明


hd