拍恐怖片積存負能量 郭奕芯性格變暴躁

  曾在電影《同班同學》中作大膽演出的郭奕芯(Ashina)在新片《鬼網》中收起性感,唔做艷星做鬼后,今次唔使再賣弄身材,反而要挑戰演技,對Ashina嚟講好有挑戰性:「唔係瞪大對眼,劈大個口就叫驚嚇,要喺面部微表情度畀觀眾睇到唔同層次嘅驚,先會令人感受到點恐怖。至少做鬼后挑戰性大啲,女星只要有身材個個都脫得啦,唔會有難度喎!」

採訪:方騫平 髮型:Iman Tang@hair corner cwb 場地:The Stadium

  郭奕芯在《鬼網》中飾演年輕網絡紅人,因為同家人關係唔好,所以搬去工廈獨居,為人熱心正直,無意中得知「好鄰居」鮑康兒被虐,出於善心所以收留了她成為好友引發連串驚嚇事。郭奕芯第一次演鬼片變得戰戰兢兢:「我本身驚鬼向來唔睇鬼戲,但做演員要試新嘢。印象最深刻有個搭出嚟嘅骨灰龕景做到好逼真,我feel到有寒意。我好記得喺馬來西亞取景時唔止驚,壓力仲好大,因為由朝拍到晚,每個表情都要做得好細緻,但因為積存咗好多負能量,個人變得好燥底,不停係咁食搞到肥咗好多,加上又水腫,塊面腫到包包咁,但都算係一個好好嘅學習機會,可以學到拍鬼片原來攞位角度同其他戲唔同,要從恐怖角度出發。」

唔會封胸

  她認為拍鬼片都好好玩,感覺新鮮啲,但否定日後會「封胸」:「睇劇本需要啦,如果有好劇本,演技得到欣賞都會做,當我決定做演員嗰刻開始就要放開,畀機會自己接受新事物,呢個叫藝術人生,唔好畀條界線限定自己。」


hd