首到溫哥華拍新戲 李思欣孖老公遊花園兼搵食

  李思欣早前與安志杰及林盛斌(Bob)到加拿大溫哥華Richmond拍攝新戲《狙擊密令》。由於該電影是老公范振鋒(Ricky)公司旗下,所以他也有同行。今次李思欣飾演一個內斂的間諜,有場戲要講英語,她稱事前都要熟讀劇本和諗方法投入,幸好拍攝過程順利,當不用開工時,她與Ricky到了植物公園遊覽,又到Night Market搵食。拍了14日,由於是首次到當地,能寓工作於娛樂,她覺得好開心。撰文:李佩儀

  李思欣今次飾演間諜都有幾多內心戲,她稱:「好多時都要多用眼神去交代,埋位前都要自己沉澱一下。」加上戲中她有個鬼佬男朋友Joshua Spence,「有一場我要用英語同佢對話,之前特登練習多啲,出嚟嘅效果都ok。」她稱與阿Bob已很熟,反而安志杰是第一次合作,「我同佢都有幾場對手戲,佢份人都幾Nice,由於佢帶傷上陣,仲要打,都辛苦㗎!」因她與Ricky是第一次去當地,所以不用開工時,當然要周圍遊覽下。

自己去玩靠Google

  他們先去溫哥華著名的植物公園「Van Dusen Botanical Garden」參觀,「啲人話有紅葉又有櫻花睇,但我哋去呢段時間係最冇嘢睇,不過藍天白雲又有噴水池都靚嘅。」之後又去唐人街附近的Gastown行逛影相留念。有時Ricky有嘢做行唔開,李思欣唯有自己出去玩,「我去白石呢個地方,都係自己Google搭咩巴士去,而嗰度啲風景真係好靚。」她最鍾意是Richmond Night Market,「嗰度似香港嘅年宵巿場,有精品賣又有小食,價錢唔算太貴。」之後仲有幫襯台灣餐廳「圓香生活餐飲」,三杯雞飯和紅燒牛肉麵都值得一試。


hd