余香凝嚇到日夜祈禱 陳家樂吊頸現場被「斬頭」

  最近陳家樂接拍的都是鬼片,新片《鬼網》中的單元《冤有頭》去得幾盡,除被冤靈劈走個頭放上櫃頂,死狀恐怖外,又要同酸臭嘔心的麥皮蟲蟲「打交道」,連女友余香凝都嚇到日夜幫他祈禱,好鬼慘!相反同片另一個單元《二重身》的男主角麥子樂就輕輕鬆鬆收工:「因為我唔使撞鬼,只係奉旨同許雅婷親熱,有二級程度嘅激烈牀戲!」

採訪:方騫平 化妝、髮型︰Yvvone Yeung、Raymond Yeung(麥子樂)

化妝、髮型:Yellow Wong、Billy Wong(陳家樂) 場地: The Stadium

  《冤有頭》單元中講趙詠瑤見舊愛陳家樂主持嘅網上探靈直播節目大受歡迎,因而翻撻前度去探靈呃like,其間陳家樂缺德地影屍體玩出火,搞到被冤鬼纏身。陳家樂說:「我死狀好恐怖㗎,化到個面青晒,成身屍斑,仲畀冤靈將個頭劈咗落嚟放喺櫃頂,所以道具設計個櫃畀我捐入去,只係凸個頭出嚟,當時唔敢望返自己個樣,冇謂望啦,而且主景喺馬來西亞一個陰森可怖嘅荒廢大宅拍攝,現場有幾十隻蝙蝠喺身邊係咁低飛,擦身而過,都怕怕地有菌。導演好識得營造氣氛,行雷、閃電加放煙,迫留10日心都寒埋,好彩喺最後一日導演先爆料話,原來拍攝嘅房間就係當日吊頸自殺現場。」

  因為陳家樂係基督徒,此行冇帶護身符,唯有每日開工前祈禱,希望唔好得罪鬼神,順利拍完平安返到香港,他自爆女友都有啲驚,最慘喺出發前一齊返教會,諗住買個十字架壓驚,點知店舖已關門,最後只可入教堂祈禱。

拍牀戲好尷尬

  至於麥子樂只係拍談情戲,對手許雅婷同麥子樂親熱期間見鬼,都幾考演技:「男仔拍呢啲戲最唔好,比女仔更尷尬,因為做多咗唔知對手點諗,做少咗效果又唔逼真,好矛盾。不過許雅婷係一個好專業嘅演員,值得一讚。」


hd