執導微電影 古巨基溫馨晒父愛

  45歲嘅古巨基,早前喺「賭城屠殺」親歷過「驚慄六小時」後,已回復忙碌工作。日前下午,黑超基仔和愛妻Lorraine現身中環遮打道,為佢主演及執導嘅廣告微電影開工。見他埋位前後心情勁好連食雪糕,其間又教兩位小演員演戲及互動,咁鍾意小朋友又食中藥調理Ready「造人」,希望基仔快啲做daddy啦! 採訪 ︰ 李維隆

  早排拉斯維加斯音樂會發生血腥槍擊案,當時身在當地嘅古巨基夫婦喺事發附近酒店狼狽逃生,經歷難忘一劫,基仔返港後重拾繁忙工作,繼上月尾去廣州舉行「古巨基《我們》世界巡迴演唱會Part2廣州站」,日前又現身中環遮打道開工。

「o氹仔」高手

  當日下午2時,黑超基仔和工作人員喺報紙檔拍攝,見報檔貼上基仔嘅「大頭照」寫上「The Father of MINI ROBOT」,然後主要拍攝兩位小朋友手持機械人跑嚟跑去嘅追逐嬉戲場面。當日唔使入鏡嘅基仔先食住甜筒在場指揮,然後企喺副導演旁睇實。拍完一場,基仔返回愛妻身邊,有傾有講休息一會。未幾,基仔笑笑口跑向小朋友,逗笑玩耍一輪,o氹到兩小孩笑到見牙唔見眼。拍多一場,順利收工,基仔再買多兩條雪條,同太太一人一條,再行上保母車走人。


hd