big big channel獨家上架 降魔的番外篇—首部曲今晚有得睇

        TVB旗下全新免費手機直播應用程式big big channel自面世以來,致力為用戶提供多元化視頻媒體內容,並積極追求突破。為此big big channel首次延續傳統電視劇集、製作全新網劇《降魔的番外篇—首部曲》,內容圍繞人、神、魔,充滿科幻靈異元素,並由楊潮凱、黃健東和鄧佩儀主演,馬國明都會以「馬季」一角客串演出。該劇總監製李松年表示這網劇是現代版捉妖魔故事,全輯共12集,並於今晚在big big channel正式上架,逢周五一連推出4集,之後更有劇場版和「彩蛋」,令觀眾一再回味又有驚喜,故萬勿錯過!

《降魔的番外篇—首部曲》故事講述的士司機「喬左治」(楊潮凱飾)頻頻撞鬼,直至重遇中學同學「高古尼」(黃建東飾)後,二人成立「降魔的士事務所」。喬左治接載羅蒂(鄧佩儀飾)時,原來她是「第六天魔王波旬」(泰臣)的么女,奉命下凡為二家姐「羅伽」(張曦雯飾)修補天上缺口,奈何「羅伽」不甘妹妹好事多為,反而派遣「雪狐妖」(許家傑飾)殺「羅蒂」,因而展開人、神、魔大戰。

製作認真揼本

  此劇看似《降魔的》的延伸,不過該劇總監製及故事原創李松年表示:「其實冇太大關連,不過想用同一啲材料炒第二碟餸出嚟,睇吓觀眾鍾唔鍾意呢個口味。」他稱《降魔的》有好多感動位睇到喊,但這網劇的焦點反而落在點樣「降魔」,劇中會出現好多新奇武器對付妖魔,故事着重趣味性,加上楊潮凱和黃健東的對白抵死搞笑,張曦雯、許家傑和陳志健飾演妖魔的特技化妝又值得大家欣賞,而且拍攝4個月,劇組走訪港九新界全實景拍攝,有場雪景,更是聘請專為荷里活電影造雪的公司負責,製作非常認真。

事前準備充兄

  最開心都是劇中三位男女主角,尤其是楊潮凱,入行9年首次擔正做男一,他坦言非常榮幸,記得當日套劇有大班演員去試鏡,考他們即場的發揮,兩、三星期後通知他可參演一角。由於劇中他要經常揸的士,他事前都要準備,「我本身有車牌,但唔係成日揸,所以拍之前特別去操車,又搵公司安排我約見個的士司機,了解吓佢哋日常生活同講嘢方式,留意吓佢嘅行為舉動。」不過最大壓力都是演喜劇,他續說:「好耐冇拍喜劇,近年都係做犯人、卧底同殺手多,今次盡量將自己好笑一面擺落個角色度。」他最希望大家看到另一面的楊潮凱。

撰文:李佩儀

hd