得意浸浸好黐身 Yumiko勁冧開心抱囡

  潮媽鄭希怡(Yumiko)近嚟愈來愈Happy,點解?皆因佢早前同兩歲半萌爆星B女梁子柔(乳名︰梁浸浸)返內地拍攝真人騷後,人氣勁升之餘,阿女仲變得好黐自己,母女感情昇華晒。日前下午,潮媽一家三口現身銅鑼灣利園,浸浸照舊勁得意賣萌,發現記者仲好怕羞扭媽咪抱抱,嗲嗲豬O氹到星媽超開心! 採訪 : 李權威

  Yumiko和可愛囡囡早排拍攝內地真人騷《不可思議的媽媽》,有指袋咗一千萬,最大bonus係兩母女感情大增長,回港後原本較黐工人同婆婆嘅浸浸,有事無事都要搵媽咪,星媽不知幾happy。

  日前下午5許,Yumiko和廿四孝老公梁學儲(Andy)帶埋浸浸行銅鑼灣利園。穿上白灰色連身裙嘅浸浸紮髮髻,依舊好cute出巡。

  星媽喺Gucci買咗袋戰利品後,就行快兩步去取泊車優惠,得意浸浸一直乖巧跟實媽咪,去到櫃位仲趁媽咪無留意,兩隻腳仔跨過條圍繩玩一餐。Daddy離遠見狀,快步上前溫柔勸止,浸浸亦好聽話,立刻行開,然後跳吓跑吓,活潑精靈,父母看在眼裏,甜在心頭。

  其後一家人行去搭(車立)取車,浸浸眼仔碌碌發現記者,即怕羞行近媽咪撒嬌扭抱。Yumiko即化身慈母踎低O氹女,然後抱起小公主走人,場面好溫馨!臨走前,浸浸仲好得冧記者哥哥,不斷揮小手say bye,可愛到暈呀!


hd