個唱前風騷到暈 周國賢想操到華仔鋼條身形

  周國賢(Endy)曾於13年因為壓力爆煲,停工到加拿大抗抑鬱。去年Endy完成專輯《風起》、會展演唱會及電影《九龍不敗》工作後,疑似舊病復發,急返加國唞唞。下月12至14日即將在旺角麥花臣舉行3場《GALACTICA銀河鉄道之夜演唱會》的Endy,今次卻放輕鬆說:「哈哈!準備時間又長,自然狀態大勇,想操到華仔鋼條身形先見人呀!」 採訪:方騫平

  今次周國賢能從容應付演唱會,開show前夕仲鬼咁風騷,唯一難倒他係要背大量複雜歌詞,37歲的周國賢竟說:「唔知點解由2010年開始填詞人就寫好多關於宇宙萬物嘅歌畀我,佢哋諗唔到我年紀大變得冇乜記性,所以重拾30幾首歌嘅歌單時真係好頭暈,如果下年開始歌詞一切從簡咁就好喇!」

  除了歌詞問題,戒口都係難事:「我好愛食台式麻辣火鍋,當年同夾band時幾乎晚晚都去打狂涮紅肉同內臟,食到個人好毒,近年好辛苦先搣甩咗隔日食麻辣火鍋呢鋪癮,不過近嚟好似大肚婆咁愛上食甜品,講起黑森林、綠茶蛋糕都流晒口水。最慘我個人易肥易瘦,就算操得點樣fit爆,打一晚邊爐第2日就打回原形。我經已諗定演唱會慶功宴要破格拉隊去食麻辣火鍋,盡情食過夠先。」周國賢話唔使操到大大隻晒肌,他反而幾鍾意做「排骨仔」,有天王劉德華咁鋼鐵身形就最好不過:「太大隻轉唔到膊,着衫頂住頂住會唔舒服,所以我一直都唔恨做大隻佬!」


hd