獲老闆揼水開show 胡渭康多貴人唔怕冇運行

  現年50歲的美魔男胡渭康,得到大名娛樂老闆林建名出錢出力支持下,將於明年2月2日假麥花臣球場舉行一場《Keep Going演唱會2018》,雖然係細場兼得一場,肯定蝕住做,但胡渭康保證唔會Hea做,林建名投放的資源比對上一次個唱花了200多萬製作費還要多,單係樂手都有十幾個,比紅館騷更架勢!他開心說:「其實打從華星時代小虎隊開始陸續有貴人埋身,以前有梅姐(梅艷芳)、o依家有林建名,個個都好錫我。」

採訪:方騫平 場地:如心銅鑼灣酒店The Penthouse

  胡渭康正學習放下執着的人生課題,凡事隨遇而安:「其實今次開演唱會都冇刻意強求,早喺年頭輕描淡寫咁同老闆提出過話對上一次個唱經已係5年前嘅事,當時老闆反應唔大,只係『哦』咗一聲就算,原來佢馬上默默『做嘢』,幫我搵期,老闆真係好可愛,佢仲唔介意我對台燈聲有要求下會超支,原先有娛樂商話可以加盟一齊玩,不過老闆唔想對方蝕本,寧願自己一個人硬食晒喎!真係好。」

加插高空瑜伽

  胡渭康在個唱中會中西樂玩crossover,其中一part舞蹈更由劇場界舞蹈老師排舞,他希望能結合高空瑜伽元素演出,當中和公司女藝人陶枳樽(Crz)有情慾辣身舞大唱梅姐及哥哥(張國榮)華星年代的經典名曲,以另類演出形式向他們致敬,不過因為會場未試過表演高空瑜伽,有待解決保險問題。問到昔日小虎隊可會合體演出?他坦承機會不大,因為孫明光經已轉行做製衣工作多年,他介意再度曝光被評頭品足,胡渭康明白對方有壓力都表示體諒:「始終唔係圈中人未必keep住狀態,不過我眼中嘅孫明光仍然好靚仔,唔緊要啦,咁樣就可以留住當日最美好嘅回憶。」


hd