個樣入型入格似社團叔父輩 大AL張武孝再做「大佬」

  夾Band出身、七十年代紅極一時嘅豆沙喉歌王張武孝(大AL),早前孖李龍基和威利開騷,67歲嘅佢寶刀未老。日前晚上,見鬈髮大AL喺尖東海旁拍嘢,身旁嘅男人稱呼佢做「大佬」,似乎曾喺電影中飾演社團叔父嘅大AL,因為外表入型入格,再次被「欽點」做大哥喎! 採訪 : 李維隆、張詠森

  唱廣東歌為主嘅大AL曾擔任「Bustop」主音,又自組玉石樂隊,85年毅然離開樂壇,04年復出。早前,大AL、李龍基和威利喺慈善騷上大唱經典歌,結果唱出商機,被邀今年7月合體開騷,喺旺角麥花臣場館舉行一連兩場《龍威武演唱會》,似足開懷舊party,反應好好,三人仲話有意添食開Part 2。

開騷反應好

  日前晚上7時許,曾喺邱禮濤電影《選老頂》中,飾演社團叔父嘅大AL,今次做「大佬」。當晚見大AL和一中年男人喺尖東海旁做對手戲。大AL手指指講幾句對白後,中年男疑似佢手下,好有義氣咁大聲回應:「大佬!你有咩事就搵我啦!」連拍三take就滿意收貨,劇組隨即轉景,繼續拍攝另一場。


hd