買蛋糕 同外父慶生 林子善忙傾生意唔停口

  早排,keep住有戲拍嘅林子善考咗個健身教練牌,話唔使拍劇時可以教健身,努力吸金幫老婆打造百萬豪華婚禮喎!日前晚上,新婚子善和老婆急急腳現身銅鑼灣,人妻入餅店買生日蛋糕,老公就好忙喺門口講語音訊息,好似傾緊大生意咁。最後,子善拖妻離開時透露,正趕去同外父食生日飯,結婚無耐就咁識做,呢位女婿真係唔話得。 採訪 ︰ 李權威

  35歲嘅林子善,今年2月6日喺日本東京摩天輪下、化身未婚妻最愛嘅動畫人物「阿拉丁燈神」向拍拖5年嘅圈外女友Kary求婚,並將價值近20萬元嘅1.6卡D色鑽戒放喺「神燈」中跪地,非常浪漫。其後10月,子善低調簽紙完婚,月尾去馬爾代夫影婚照,明年4月喺將軍澳一酒店擺酒,筵開五十席,預計使費過百萬。

  日前晚上7時,正開拍無線新劇《十二傳說》嘅cap帽子善和老婆去銅鑼灣Shopping,買咗袋戰利品後就急急腳喺鬧市四圍望,似搵緊路。

  行到去白沙道嘅東海堂後,兩公婆分工合作,太太入去揀蛋糕;子善就好鬼忙喺門口講語音訊息,來回踱步兩、三分鐘不停講,講完又聽,似傾緊大生意咁。等老婆買完個蛋糕,子善火速同愛妻十指緊扣快急走人。記者上前採訪,子善大方透露:「買蛋糕畀外父呀!o依家趕去同外父食生日飯,bye bye!」


hd