Keep住戀愛mode 李玟拖夫聽歌歎意菜

  早排,幫克勤個唱做嘉賓,被對方封咗做「電臀」嘅勁舞天后李玟(CoCo),不時同外籍老公樂裕民(Bruce Rockowitz)晒恩愛。日前晚上,忙緊做世界巡迴演唱會嘅CoCo,趁有空在港即陪honey去灣仔撐枱腳歎意菜。當晚兩夫婦一邊聽住強勁音樂,一邊隨節奏搖搖頭大快朵頤,鬼咁合拍。離開時又十指緊扣,結婚6年都似熱戀情侶呢!  採訪 : 李維隆、張詠森



  現年42歲嘅CoCo,11年下嫁利豐集團執行總裁Bruce Rockowitz,變身闊太基本上唔使做,但CoCo仍然好勤力,近排仲開始巡唱O添,所以「造人大計」又要順延至下年先得喎!

  日前晚上10時,難得在港唞唞嘅CoCo,梗係要陪吓老公啦!當晚,兩夫婦一身便裝去灣仔菲林明道嘅意大利餐廳食飯。兩公婆並排坐喺卡位,恩愛開餐。食食吓,餐廳改播一連串disco music,「電臀」音樂人妻即時「上晒電」,隨歌搖搖頭又口郁郁,好enjoy。其夫亦被愛妻感染,一齊「un」吓身搖吓頭,好有mood咁一邊食一邊聽音樂。

  其間,有一紅衫友人走近同CoCo say hi,似係朋友就坐低吹水。三人一邊歎吓酒,談笑風生,開心吹水半小時。臨近12時,CoCo夫婦和紅衫友人夫婦齊齊走人,四人行去上車時繼續傾,最後攬攬道別,CoCo兩公婆由司機接送離開。


hd