雜食Regen 一晚兩仔 連詩雅孖姊妹 戰鬥格蒲音樂節

        繼今年9月喺西九文化區舉行嘅戶外電子音樂節,有樂迷疑濫藥致一死三命危後,日前喺中環海濱一連三日舉行嘅Clockenflap亦發現「毒蹤」。有人迷幻濫藥,喜愛夜蒲嘅連詩雅Shiga唔怕死,首晚已孖住王宗堯舊愛、C cupO靚模姊妹黎紀君(Christy),齊齊濃妝晒腿,戰鬥格蒲音樂節。同一晚,HotCha前成員張惠雅(Regen)與有米歌手張子丰(Fred)連體行超市,之後再會合男方前度何雁詩和陳瀅殺入音樂節。離去時,早前被影到有大鼻新兵嘅Regen極速換畫,被橫間衫男攬住坐的士走,29歲女感情生活,好亂吓喎!

        連詩雅早排同鄭融喺麥花臣開演唱會,性感谷胸載歌載舞唱得好high。日前,成日扮ABC嘅Shiga見中環有music party點會錯過,即相約閨密Christy去音樂節玩番晚。當晚,Shiga撇甩有米音樂人男友徐浩,穿上露膊冷衫、短牛仔裙晒長腿。早到嘅Shiga喺門外不停玩手機,雖然被唔少途人認出,但Shiga一於好少理,企到擰身擰勢。其後,束上髮髻嘅Christy急步前來,兩姊妹作狀攬攬又依嘩鬼叫,慌死無人認得!然後蹺晒手興奮入場,又飲又跳,顛足成晚。

何雁詩同舊愛有計傾

  同一晚約6時,HotCha前成員Regen同環星唱片太子爺張子丰雙雙現身中環ifc嘅city'super。一向旺桃花嘅Regen,早排先被本報影到有位貌似韓星朴海鎮嘅大鼻新兵哥陪飲嘢,新兵仲極度迷戀女方,托頭痴望中晒「Regen BB」降。點知過幾日,Regen已搵張子丰攝時間,二人同行超市貼頭揀酒,揀嚟揀去無idea,求其買兩支水走人。然後在超市門口會合埋Fred舊愛何雁詩和陳瀅。孖辮妹陳瀅和閨密何雁詩穿上同款棒球褸出現,難得張子丰和何雁詩呢pair過氣情侶再見亦是朋友,三女一男手舞足蹈吹水行去音樂節,再入場會合埋馮允謙等,玩足4小時high爆走人。其間,童顏Regen最早離開,身邊男伴亦換上另一人,見Regen一味甜笑樣子勁冧,同橫間衫新仔離開,男方仲輕攬女方腰,再甜蜜搭的士走人。

採訪 : 張詠森、李權威、梁志明


hd