試長Boots 黎美言扯高闊褲露大髀

  諸葛紫岐(Marie)旗下藝人黎美言(Winkie),月前踏入「29+1」,承認有心上人恨結婚生仔。日前下午,Winkie獨自去銅鑼灣希慎廣場行街,買咗兩袋戰利品後,再去I.T買鞋。為試長boots,佢將長闊褲扯高,露出大髀仔變短裙。而且粉紅色闊褲質地好薄,暗裏透「黑色底底」,幾誘惑喎!採訪 ︰ 梁志明

  HotCha前成員黎美言,自真人騷節目《G-1格鬥會》後,殺出了一條血路,近年佢兼做歌手和打女,更考得泰拳教練牌,開設了泰拳跳舞學校。Winkie月前生日開騷時話:「自己29加1,亦係入行10年。生日願望成功做多方位藝人。」席間,佢仲透露有心上人,但不會主動追求對方,更渴望結婚及生BB。

恨結婚生B

  日前下午4時,化晒妝幾靚嘅Winkie一個人去銅鑼灣希慎行街。早已買咗兩袋戰利品嘅佢,入咗間時裝店閒逛,揭兩揭又掛住玩手機,就轉場去I.T睇鞋。見佢兜個圈,話咁快睇中兩對黑色長boots,一對膠面水靴款;一對就係over the knee黑皮款。Winkie試鞋時,扯起條粉紅色闊身長褲,打出個大髀仔照鏡。似乎好鍾意對千幾元嘅及膝靴,有修身作用,雙腳睇落都長啲啦!試啱即買走人。


hd