內地頒獎禮唱廣東歌 樂隊spACE望打入內地

  樂隊spACE 繼三月推出同名EP後,最近才有新歌《無法一吻》派台,不過今次五子不再自家製MV,主音周吉佩(吉吉)笑言不用兼任導演輕鬆得多。樂隊最近在內地《第四屆粵語歌曲排行榜頒獎禮》奪得「最受歡迎樂隊」,還有機會在台上首次演繹廣東歌,他希望樂隊能憑廣東歌進軍內地巿場。採訪:杜淑霞

  以往是獨立樂隊時,spACE的MV都自家製,今次《無法一吻》公司就建議搵人幫手,spACE專登去了吉吉提議的下白泥拍攝,「導演話想要個靚景,我去過下白泥,不過要下午3至6點潮退加黃昏最靚,所以嗰日只得下白泥係齊人嘅,單頭各自去唔同地方拍,大家拍足14個鐘,但係效果靚最重要。」雖然要拍咁長時間,但吉吉竟然話唔算最辛苦,「以前係獨立樂隊時,為咗慳錢我要兼任埋導演,嗰時仲辛苦啦!後期又要跟,O依家反而輕鬆得多啦!」

預頒獎禮食白果

  隔咁耐spACE先再有派台歌,吉吉就解釋他們製作程序慢了,所以預了今年在港的頒獎禮未能有好成績,幸好他們最近在內地的《第四屆粵語歌曲排行榜頒獎禮》奪得「最受歡迎樂隊」,不過五子除了為有獎而開心,最難得可以上台表演,「上年我哋攞新人獎冇機會唱歌,今次終於可以,仲同鄭世豪佢哋一齊唱咗啲經典廣東歌,仲唱埋《無法一吻》,今次係我哋第一次喺內地頒獎禮唱廣東歌,希望嚟緊我哋可以繼續用廣東歌令更多內地樂迷認識啦!」


hd