捱眼瞓拍《溏心3》 關菊英鬧人鬧得好過癮

  11年前,關菊英復出TVB接拍了《東方之珠》及《溏心風暴》系列,「細契」一角贏埋2007年台慶「我最喜愛的電視女角色」成為她的代表作。10年後,原班人馬夏雨、米雪、李司棋及阮兆祥等齊延續《溏心風暴》,雖然拍劇要捱眼瞓好辛苦,但她好珍惜及享受過程,至於戲癮會否陸續有來?菊姐以「生仔姑娘醉酒佬」唔要又要,唔制又制心態來形容:「真係唔知㗎,演戲係有無比嘅吸引力,可能痛完再生過,醉完又飲過囉。」 採訪:方騫平 場地:Club One時尚康山

  《溏心風暴3》中菊姐跟祥仔做姊弟,貪小便宜的菊姐為幫不中用的阮兆祥爭取成為公司要員而與李司棋針鋒相對,搞鬼行為令人會心微笑!

  菊姐強調,戲裏角色經要同人互寸互窒,現實生活就好少發脾氣,唔容易鬧人:「呢啲叫演戲嘛,做不一樣嘅自己先過癮,但平日唔慣鬧人更加要熟讀劇本,編劇本身寫得好精采好立體,所以我堅持要隻字不漏咁跟足去講先有意思,有好多場口對白特別多,我要背足兩頁紙。」

拍劇求滿足感

  菊姐拍劇唔係為名利及為獎,完全係求滿足感:「當年離開香港10幾年,返嚟復出拍《東方之珠》試完水溫就拍到《溏心風暴》系列好幸運,今次角色依然有發揮,拍得不知幾過癮,就算係做小人物角色,身邊朋友都好支持我。我諗如果呢套劇反應好,《溏心風暴》系列會欲罷不能,到時我又再歸隊。」


hd