「人美心善」萬人迷 女神姚子羚被有米男友睇到實

        日前喺《TVB馬來西亞星光薈萃頒獎典禮2017》勇奪「最喜愛TVB女配角」獎嘅姚子羚(Elaine),站台時喊爆呼籲「領養唔棄養」嘅片瘋傳,獲得一眾貓狗奴狂讚,讚佢係「人美心善」真女神。女友變萬人迷,子羚嘅有米男友「的士邦」鄭子邦當然要全天候目及到實。日前晚上,愛心女神子羚薄妝和男友喺銅鑼灣希慎廣場撐枱腳。其間,二人發現有記者,的士邦都繼續同女友甜笑開餐,有個人靚心更美嘅滿分女友,梗要高調宣示主權啦!

        上月37歲生日嘅姚子羚做咗幸運女神,出席大馬雲頂嘅頒獎禮時,憑《胡說八道真情假期》及《姊妹淘馬來西亞篇第三季》有份贏得「最喜愛TVB綜藝節目」及「最喜愛TVB資訊節目」,連同《同盟》中嘅Kate拎埋「最喜愛TVB女配角」,三度上台領獎嘅Elaine可算係當晚大贏家。獎項無疑為入行15年嘅Elaine錦上添花,女神獲女配角獎時,提起16年1月被收養嘅愛犬通仔咬傷粉臉致停工半年時流淚呼籲大家「繼續領養(動物),唔好棄養。」真心話贏盡掌聲,萬人like。

搶手女友 好細心

  日前晚上,拍拖3年幾、屢傳好事近嘅人氣女神薄妝戴cap帽與男友鄭子邦去希慎廣場撐枱腳。戒肉茹素嘅拖友即點咗意粉、沙律等做晚餐。而一向怕羞嘅「的士邦」仲揀正對正門口坐,高調與女友溫馨開餐,宣示主權嘛!見子羚好細心幫男友捲意粉,兩人甜笑互望勁sweet。未幾,子羚發現有記者,就笑笑口步出同記者「講數」,溫柔嗌記者:「可唔可以唔好影住呀!」隨後返回男友身邊,提議honey坐入啲。見「的士邦」擰擰頭全不介意,繼續食飯。歎足個半小時,二人前後腳行去利園等的士,同返紅山半島愛巢。

  另一日晚上7時許,子羚獨自去銅鑼灣連環Shopping。見佢行去D-mop時冧笑講電話,唔使問都係同honey傾「蜜偈」啦!其後,女神在店內揀了兩件衞衣和一條褲,畀錢後步出門時,同記者微笑打招呼,勁有禮貌。

採訪 : 梁志明

hd