最豐收的一年 閻奕格重上舞台開個唱

  2017年終結前夕,27歲的閻奕格(Janice)作出年度檢討,今年是她豐收滿足的一年,入行7年剛推出處女唱片,兼且第一次演音樂劇、做簽唱會、玩街頭Busking,最難得係12月12日假展貿中心Star Hall舉行一場《我有我自己音樂會-香港站》。之前Janice曾因不當減肥搞壞身體,白白要停工兩年調理,同時處理情緒問題。今次重上舞台,令她更懂得珍惜。

採訪:方騫平 服裝:PENNYBLACK 髮型:Haysses Ip @ HAiR

  閻奕格認為今次是一個代表自己說話的一場show:「今次第3次係香港舉行個唱,開show前終於出到唱片喇,我好想同fans齊齊分享屬於自己嘅好歌。O依家可以上返舞台唱歌要好好珍惜,要做一個大型溫馨gathering。」她預計在演唱會上有感性事同大家分享,所以好怕由頭喊到尾,希望唔好喊到唱唔到歌:「因為我實在太感激粉絲,大碟《只有你還在》係我送畀粉絲嘅心聲,多謝佢哋一直陪伴住我,如果冇歌迷我唱比邊個聽呢?」

  她承認之前因為暴肥60磅搞到情緒困擾想過輕生,經歷過低潮學會了面對壓力及負面評論:「O依家睇開咗開心咗好多,知道唔係個個鍾意自己,唯有盡力做到最好。」問到上圍豐滿的閻奕格可會在個唱上性感示人?她笑說:「咁又唔使,鍾意好身材嘅人未必支持我,佢哋嚟睇騷係鍾意聽我唱歌同埋分享呢幾年嘅心路歷程,性感反而嚇親佢哋,我歌迷係好保守嘅人,我喺《閰羅王》MV度大露背到pat pat都嚇咗佢哋一跳啦。如果每年要搵新挑戰,明年可能會突破演埋戲,自音樂劇《風雲》後開始演出戲癮來。」


hd