模範父子真人騷 吳鎮宇與9歲囝溫馨互餵

        內地親子騷嘅威力驚人,近排Yumiko和浸浸、陳小春和Jasper等人氣狂飆。3年前,吳鎮宇亦曾帶兒子Feynman拍《爸爸去哪兒2》,當時5歲Feynman眼仔碌碌,兩父子勁受歡迎。日前,呢對模範父子檔喺銅鑼灣利園上演溫馨父子真人騷。鎮宇慣性戴帽戴口罩密冚靚仔樣,9歲乖仔就坐身旁食花生糖。其間,Feynman食到得意忘形之際,突然餵Daddy食一啖,兩父子再輪流互餵,場面好有愛O架!

        吳鎮宇和Feynman呢對模範父子經常連體出席,早前,鎮宇自編自導自演嘅電影《費曼的夏天》亦搵囝囝客串,更自爆父子間溫馨笑料,他說: 「阿仔經常恰我,會撒嬌、食咗我啲點心,趁我去洗手間食剩一粒點心畀我,佢一個人可以食到兩人分量,我笑佢似雪人,唔見咗條頸。」信佛嘅鎮宇亦注重身教,早前兩父子到內地山區探訪,他大讚Feynman:「一講做善事,佢可以忍受幾個鐘頭嘅長途車,冇沖涼,冇pizza食,仲好慷慨咁將自己嘅玩具捐出去。」

「骨架大、好大隻」

  日前晚上,予人好warm感覺嘅鎮宇父子現身銅鑼灣利園。兩父子坐喺商場外等司機,密冚樣嘅daddy忙玩語音訊息;被父親話「骨架大、好大隻」嘅Feynman就乖乖伴身旁食花生糖。見Feynman落力扯咬糖,食得鬼咁滋味。不過阿仔好精乖,有好嘢食梗同最愛嘅爸爸開心share!於是乎食食吓,就遞嚿糖畀daddy,鎮宇甩口罩甜笑食一啖,微微笑勁窩心。再輪到慈父出手餵仔,父子互餵,溫馨放閃。未幾,司機駕七人車到達,鎮宇溫柔拖仔上車走人。

採訪 : 梁志明

hd