聖誕前同32歲女友鬧分手 81歲謝賢寂寞搵拉姑陪

  81歲謝賢與32歲上海女友CoCo拍拖12年,四哥坦言未遇過一個女仔同佢咁夾,但經歷兩次婚姻失敗後堅拒再婚。近年二人分手復合無數次,近數月亦未見CoCo「人肉速遞」來港陪四哥,疑似再度分手。早前他約前妻「拉姑」狄波拉和其現任老公鬍鬚Kong(江耀城)到銅鑼灣行街,四哥不斷喺拉姑耳邊「依依哦哦」,由三人行買衫變Cova申訴大會。難得鬍鬚Kong無詐型,仲好識做地全程對呢對前任夫婦保持適當距離,待四哥可以盡訴心中情,呻吓解吓悶,舒服晒。 採訪:梁志明

        四哥一生中有五個女人,與息影女星嘉玲和蕭芳芳拍過拖,而甄珍和拉姑就是離婚收場。由於拉姑與他育有霆鋒和婷婷,有子女維繫,他們再見亦是朋友,一家四口亦常有家庭聚會。現任女友CoCo與四哥相差49歲,但她表示男友很呵護她,與他一起很幸福,只是不時被追訪會有點壓力。故近年二人感情較反覆,不時傳出分手,前年他們試過分完手再復合。愛得難捨難離,無奈四哥揚言不會再婚,他仲瀟灑話CoCo搵到筍盤可以走,但心裏又希望百歲之時有女友相伴。

四哥之講極唔完

  日前四哥相約拉姑同鬍鬚Kong去銅鑼灣利園行街,四哥係咁捉住拉姑講嘢,拉姑無所謂,一路聽一路揀衫。原本拉姑去完Valentino後再去Brunello Cucinelli幫兩位男士揀衫,但四哥真係好吹得,Non Stop係咁講講講講講講,鬍鬚Kong見四哥講嘢多過睇衫,都唔敢黐得太埋,經常殿後等佢跟拉姑可以暢所欲言。在該店逗留10分鐘,三人索性轉場去Cova坐低飲嘢慢慢傾。此時鬍鬚Kong又好醒咁做行頭嗰個,幫佢哋搵定位。

四哥之大把嘢煩

  其實四哥除了感情煩惱,早前他因參與內地綜藝節目《寶貝的新朋友》而惹是非,事緣5歲小男生拍檔講咗句唔禮貌嘅說話,四哥喺鏡頭前起腳踢對方的屁股,行為引起網民不滿。而大仔霆鋒亦有好多是非,近期因佢主持嘅真人騷節目《鋒味》要求素食廚師煮肉,對方因拒絕被foul出局,結果惹起爭議,網民亦瘋狂地鬧霆鋒唔識尊重人。當日呢餐茶傾咗好耐,講足三個鐘都未完,好彩鬍鬚Kong有耐性,可以坐埋一邊慢慢等。

hd