相隔20年再合作 Sammi梁詠琪片場大把嘢傾

  由鄭秀文(Sammi)和梁詠琪(Gigi)主演、關錦鵬執導的新片《暫名:八個女人一台戲》,昨日於香港大會堂取景拍攝。Sammi和Gigi相隔20年再合作,兩人都表現得好開心,更互讚大家都開朗咗又Keep得好,拍戲時好多嘢傾。本報記者

  在新片扮演話劇天后的Sammi,表示戲中跟Gigi因往事產生心結,又指今次要飾演一個有十幾歲兒子的媽媽,完全不須衝破心理關口,反而覺得好自然,她說:「除非話個仔30幾歲就怪,但十幾歲都好合理,睇完劇本好鍾意。」雖然她從未演過這類角色,但經過多年累積演戲經驗,她有信心駕馭到,不會像以前演《長恨歌》時帶着戰戰兢兢的心情。

  對於跟Gigi再合作,Sammi坦言好開心,她說:「Gigi現在有家庭同小朋友,睇到佢成個人好活潑同開朗,我自己亦有家庭,大家都keep得好好。」Gigi亦回應說:「我都覺得佢比以前開心同開朗咗,今次同佢嘅感覺好似重逢,拍戲可以多啲時間傾偈。」她笑指知道跟Sammi合作便一口答應,又會想起以前一起拍青春片的畫面。此外張衛健(Dicky)前晚為已故胞弟張衞彝舉行追思會,有份出席的Sammi續稱:「成個過程Dicky處理得好好,張媽媽亦好堅強。」


hd