參加《誇極限大挑戰》障礙賽 陳婉衡全身入晒泥

  繼本周日胡諾言、黃美棋及簡淑兒到東京勇闖20多個障礙賽後,下周日晚10點半播出的《誇極限大挑戰》輪到有6塊腹肌的準新郎林師傑、36E陳婉衡(Alycia)及32C林泳淘(Wingto)赴馬來西亞新山挑戰攀爬、上山及搬重物等挑戰,考驗耐力及體能。自細因身材問題,Alycia跑步一直包尾,今次能突破身材界限挑戰成功,她形容滿足感好大,就算落泥地,搞到身體如肚臍、鼻窿及耳仔窿等都入晒泥,要大清洗都值得。

採訪:方騫平

  因為林師傑要參加6公里障礙賽,故陳婉衡及林泳淘要相依為命,「因為我哋兩個向來少做運動,香港出賽時失敗咗,所以今次目標定得好低,只要完成任務已好滿足,雖然做吓拍吓都冇計較時速,但大功告成嗰刻Wingto開心到喊,我就愈玩愈過癮,覺得似隻馬騮仔咁爬來爬去,希望下次在港出賽時可以再下一城,挑戰更高層次。」

最怕月事早到

  問到最辛苦係咪落泥灘做泥人?Alycia大笑說唔係:「反而落泥灘冇問題,我有晒心理準備要大清洗幾日,而且我冇潔癖,最擔心係月事問題,計落係危險期,如果有唔方便就好麻煩。最難反而係跑步,我由細到大唔跑步,因為每次都係跑最尾有陰影!跑得咁渣應該同身材冇關嘅,哈哈!小學都未發育經已包尾啦,搵嘢瀨唯有話腿太粗兼有扁平足!不過,之前有經驗,所以識去買合適嘅運動內衣,知邊啲可幫到我呢類身形,現場沙石太多,唔方便着太少,所以着住背心都OK。」


hd