新碟唱盡愛情觀 薛凱琪撐祖名係好男友

  自言玩足4年的薛凱琪(Fiona),全新國語專輯《你我之間》終於面世,慢工出細貨,搞到Fans苦等9年。不過,意外驚喜係大家可以見證到呢4年阿Fi的愛情觀轉變,從《天生一對》、《做我的知己》、《遠遠關心》、《Don't Let It Go》及《一生無求》等曲詞,憑歌寄意。她坦承在愛情路上曾被hurt過,愛過恨過亦原諒對方。問到男主角是否昔日緋聞男友房祖名時?Fiona瞪大眼否認,仲力撐係「自己友」,澄清大眾對他的誤解:「我哋從來冇拍過拖,如果拍拖佢唔會辜負女朋友,呢個我可以好肯定。」 採訪、方騫平        化妝:Frances Ho @ Jessica Chan Make-up Workshop 髮型:Jo Lam @ Muse Hair        服裝:SPIRITUNUS

  薛凱琪國語專輯《你我之間》收錄了9首歌,全部都包含自己的元素,她想做到每首歌係自己日記,將全部愛情經歷、想法都記載。她說:「愛情其實係一件好簡單嘅事,但往往愛一個人有好多複雜情感、思維會發生,亦可以令你好痛。不過,自從學咗打坐體會呢個世界係善良嘅,遇到一個人或者碰見一件事總有原因,或許學會點樣去原諒,為未來做更好嘅選擇。」

  近年來,戀情成謎的Fiona被問到感情道路上處於咩階段時?阿Fi露出古惑笑容說:「我唔會答你係熱戀定…哈哈…尋覓中,充滿住希望嘅尋覓,相信未來嘅愛情會再簡單啲,再光明啲。上天會安排一個好簡單嘅愛情畀我,我渴望簡單。而且只需要一個咁多,小小豐收就得。」

等待愛情

  Fiona又分享過去錯誤的愛情觀,她感觸說:「以前好憑感覺求偶,OK就單方面付出所有,覺得自己好開心、好偉大,但未必得到重視,o依家我明白到真愛唔係自己付出就夠,對方冇好好接收同珍惜只會hurt到自己,揀男仔係要平等去愛。」05年,Fiona與房祖名合演電影《早熟》,飾演一對偷嘗禁果的小情侶而被傳撻着,其後多次被發現出雙入對,又被爆同遊日本,之後分手、復合等傳聞不絕。問到當年係咪痴心錯付房祖名?她則笑住否認:「你咁問實在太唔應該,(係咪原諒咗佢?)咁講對佢太唔公平,因為佢從來冇唔珍惜過我,我哋從來冇拍過拖,我認識10多年嘅房祖名,好肯定,佢同到一個好愛嘅女仔拍拖,佢會好珍惜佢,因為佢個人好一致,有啲嘢好愚蠢,有啲好聰明,有啲好死板,如果歸納自己人圈子會永遠對你好。」


hd