唔搞笑玩深度 Ben Sir扮朝偉做「粵問宗師」

  由教育界踩入娛樂圈的歐陽偉豪(Ben Sir)人氣旺,主持、廣告及拍戲機會一個接一個,之前Ben Sir以電影《食神》造型拍胃藥廣告獲好評,最近再拍眼鏡廣告,但導演周文亮 (Charles)欣賞Ben Sir雖然滿肚「墨水」,但為人內斂又有深度,刻意收起他搞笑一面,打造成《一代宗師》「葉問」梁朝偉feel,正好配合品牌走深度切割的設計。對於成為「粵問宗師」,Ben Sir坦言滿意效果,大讚有驚喜:「我同偉仔最似嘅地方,都係有自信嘅笑容,帶點寸寸哋。」採訪:方騫平

  眼鏡廣告由導演周文亮寫故事、度對白、攝影及剪接一腳踢,他覺得Ben Sir有朝偉「葉問」Feel,實行二次創作,不過,王家衛珠玉在前,團隊有唔少壓力,好彩出來的效果配合得到。連好有要求的Ben Sir都感到滿意:「原來除咗星爺外,仲有梁朝偉mood,不過自High冇意思,要人哋認同先有用。藝人喺突破前難免要模仿,吸收前人經驗,其實自己做正經嘅角色都可以勝任,好似《愛情奴隸獸》、《3個綁匪7條心》都係做警察;《我的情敵女婿》做會計師、《誇世代》做醫生、最近同甄子丹拍校園電影做體育老師同樣啱我身份,可能大家鍾意我專業形象,Hea中帶搞笑,背後又要有小小智慧啩。」

恨同朝偉星爺合作

  當問到是否想跟「萬人迷」梁朝偉合作時,他即時𦧲飯應:「梗係好啦,自己係新人想同大明星合作,我可以做少年葉問,或者做佢徒弟、徒孫,太長遠嘞,不過人有夢想好過諗都唔敢諗,好似自己都估唔到可以同甄子丹合作。我亦聽到坊間有聲音話我好似星爺,好想我哋可以合作,自問幾恨,但高攀唔起,不過,我都覺得自己無論喺動靜、語氣都似佢,絕對有信心做星爺替身,以前我有寫論文研究星爺語言,佢用好多舊式語言重複字句。」


hd