遊首爾首次睇紅葉 利嘉兒見賣狗肉湯唔舒服

  利嘉兒(Lily)早前與友人到首爾旅遊,以往多是行街的她今次以觀光為主,她去了著名的南山塔睇紅葉及情人鎖,最好笑是去Cafe飲嘢時見到一隻跟愛犬一模一樣的黑色貴婦狗,最難忘是有朋友帶她去南大門附近的舊區吃地道食物時,居然見到有狗肉湯售賣令她好唔舒服。

  Lily因為經常睇韓劇所以對南山塔好有印象,但去過多次首爾都未踏足過,她表示:「上到去風景好靚,可以見到整個首爾,仲有好多情侶會買啲心形鎖再喺鎖上寫願望掛喺嗰度,寓意愛情能長久。」由於Lily好鍾意韓國卡通公仔,所以特別去了Line Friends專門店,她坦言:「原本仲想去Kakao Friends專門店,嗰間先係我最想去,但因為行程太緊密,唯有下次再去過。」

  另Lily去了間Cafe,店主養的貴婦狗跟她的愛犬一模一樣,「我影咗張相放上網,朋友真係以為我帶咗愛犬去旅行。」最恐怖是去南大門附近的舊區搵食時,見到有狗肉湯賣,她說:「一路行都見到有補身湯,以為係韓國藥材湯,後尾行過一間見佢放咗成盤肉出嚟,聞到陣羶味,佢寫明係狗肉湯,嚇死我,因為我好鍾意狗,見到好唔舒服。」撰文:李佩儀


hd