發酒癲搵女友吐苦水 張建聲呻完笑晒上車走

  入行7年嘅張建聲(Justin),去年憑網劇《反黑》中「招積」一角奪得人氣獎,仲與同公司女藝人兼崔建邦舊愛陳嘉莉(Kelly)蜜運。日前凌晨,Justin和拍拖一年嘅女友Kelly現身尖沙咀寶勒巷,男方面紅紅忟憎猛呻,難得女友好有耐性,細心聆聽,最終o氹番honey笑。見Justin上車時笑晒口,似乎對脾氣超好嘅女友好滿意囉!採訪 ︰ 李維隆、李權威

  曾增肥50磅拍《壹獄壹世界》嘅張建聲,去年終於抽到支好籤,漂白髮和眉毛喺網劇《反黑》中飾演社團狂派「招積」,令佢人氣急升,名利雙收,都不枉佢當日為角色患上情緒病啦!日前,Justin出席電影《3個綁匪7條心》首映禮時透露嚟緊會為兩部電影做監製及演出,年中網劇將會開拍續集。

女友溫柔慰藉

  日前凌晨3時許,見飲醉酒嘅Justin和素顏女友Kelly喺寶勒巷拖拖拉拉。男方係咁發嘮叨、噴口水,難得女友仔一直有耐性、仲keep住微笑溫柔握住Justin隻手加而安慰。呻咗十分鐘,Justin開始釋懷,攬攬Kelly,擁抱一吓呢位絕種好女友。最後,Justin拉女友企街傾多幾分鐘,愈講愈開心,心情好番晒露出笑容,然後就截的士,雙雙走人。


hd