男友元旦晒愛 直擊 甜蜜行超市 G.E.M.任影唔嬲開心傻笑

        26歲嘅「宇宙漿」鄧紫棋(G.E.M.),自去年被揭同高大造型師男友Mark Ngai拖手遊日本東京後,一直和男友寓工作於拍拖,幸福日日見。其後,Mark大方晒出為G.E.M.慶生嘅照片,又喺網誌大晒情侶鞋等,戀情浮面。日前,男神Mark激罕貼出合照,似想公告戀情,女友當然甜在心頭啦!日前傍晚,宇宙漿戴口罩遮素顏孖男友去中環ifc上糧,就算被記者撞破拍拖,G.E.M.都只係不停「哈哈哈」傻笑,任影唔嬲,似乎被男友成功收服,變得平易近人咗囉!

        自14年參加湖南衞視《我是歌手2》火速爆紅後,G.E.M.開始被指囂張、耍大牌,恃紅生嬌,犯眾憎。直至去年4月,G.E.M.拖Mark甜蜜遊東京,似宣示有位有型有錢男神男友囉。不過呢段戀情撻着並唔光采,早於16年1月,Mark仲係同JW(王灝兒)拍拖時,有傳G.E.M.強搶閨密JW男友,兩女爭仔反目。其後JW與卓悅太子爺葉韋彤打得火熱,宇宙漿才「解鎖」默認男友,仲不時開晒口恨嫁,似乎想向男友迫婚!

打情罵俏

  日前傍晚,G.E.M.密封素顏樣孖男友去ifc city'super買生果、零食。二人拍拖逾一年好合拍,男方推車仔;女友揀嘢,仲懶理旁人不時打情罵俏,愛得高調。揀完紅提、蜜桃等生果,兩人轉攻零食薯片等,G.E.M.又踎低揀薯片,服侍周到。未幾,大眼Mark發現有記者,即向女友通水,但宇宙漿毫不介意,繼續買嘢,仲不停「哈哈哈」開心傻笑,唔怕撞破好事。其後,兩人排隊埋單,男友主動畀錢又man爆拎嘢,G.E.M.全程露出幸福腰果眼,表現好冧!記者上前採訪,G.E.M.甜笑叫男友行先,然後親民吹水話:「節日有同屋企人食飯,之前去大連開工呀!」但問到戀情,佢都甜笑唔答,再同記者揮手say bye,雙雙上七人車走人。

採訪 : 張詠森

hd