被睇死婚姻唔長久 Tom@Mr.呻:唔係做畀人睇

  樂隊Mr.鼓手Tom(杜志烜)跟模特兒太太Leanne(何思諺)早前首次參與ViuTV實況節目《婚姻五重奏》,去伊朗旅行兼大談愛情觀。出發前因安全問題兩公婆意見分歧,到埗後才知對伊朗有誤解,正如外界一直不睇好他們這段奉子閃婚,不過Tom和Leanne一於少理,還異口同聲表示:「結婚唔係做畀人睇,我哋點樣相處自己最清楚。」

採訪:杜淑霞 化妝:King@Kingsmakeup 場地:節奏生活

  最初Leanne答應參與節目不久,伊朗就發生炸彈襲擊,令Tom同太太一度意見分歧,Tom說:「意外真係好難講,個仔仲咁細,真係會擔心,但太太又話應承晒人,我知佢好想去,同埋製作單位都話冇問題。點知去到係完全改觀,唔單止好安全,仲好乾淨,人又友善。」

搞好經濟最困難

  11年Tom跟Leanne拍拖僅3個月便奉子閃婚,誕下囝囝卓霖(暱稱杜杜)後,外界仍不睇好,他們坦承這是婚姻第一次難關,Tom說:「嗰時都想唔理咁多,但係呢啲聲音咁多年都無消失過,當然都有為過呢啲聲音唔開心,但係日子耐咗就想通,我哋結婚唔係做畀人睇,我哋點樣相處自己最清楚。」婚姻邁向第7個年頭,杜杜亦準備上小學,Tom和Leanne反而認為經濟才是婚姻最大問題,Leanne說:「頭嗰兩三年經濟未咁穩定,嗰陣時反而係最擔心,後尾佢開咗鼓室,我做手作生意,慢慢叫做好啲,大家都有互相畀意見對方。」Tom補充,「我哋所有嘢,好似教杜杜都會有商有量。」難怪睇見他們相處,唔知情仲以為係熱戀情侶。


hd