健康無價 專心照顧曾患癌老公 譚小環魚蛋王國 擱置擴充

        去年9月11日是譚小環同老公蔡強榮(Eric)結婚10周年紀念,當時Eric更送上旺角及鰂魚涌兩間小食分店畀小環打骰,獎勵她3年來辛苦賣魚蛋的成果。連同銅鑼灣總店及尖東分店,小環手持合共4間小食店,Eric本來想在年底前開足6間為小環打造「魚蛋王國」!可惜9月中,Eric因發高燒入院,順便做埋身體檢查,10月證實患上一期肺癌。經此一役,所有大計全面煞停,兩公婆決定慢活人生,小環說:「就算佢畀晒過億家財我又點?錢財身外物,親人健康就得,開心最重要,反而我愛佢多咗。」日前傍晚,小環兩公婆去銅鑼灣超市買餸打邊爐,開過刀,傷口最大有4吋的Eric不時摸住右肺傷口位置,行路步速頗慢,祝早日康復。

今次Eric意外發現生Cancer,他氣若柔絲憶述說:「去年9月正值落手落腳將生意擴充大做,操勞到發高燒,出院後又病住做,直至有次陪老婆做體檢發覺自己體重唔覺唔覺暴跌20磅,醫生朋友建議我做檢查,點知一照就見到肺部有8cm陰影,後來再進一步接受正電子掃描,數據仲嚇人,恐怖到話係有機會患肺癌3期。最記得做手術前一個上午仲峰迴路轉,醫生抽組織後突然又話喺我身上搵唔到有任何癌細胞,要我先出院等消息,直至出院後兩日經醫生仔細研究,終於搵到源頭,右下肺葉癌細胞2cm,好彩只係1A期完全無擴散。最後醫生幫我做微創切除右邊上下肺葉的一半,共開咗4刀,最大的傷口都4吋,其他的都係1吋左右長。手術成功,無需化療。術後傷口劇痛,尤其係神經線要較長時間先康復,住院其間物理治療師教我練習吹波波,目前肺葉脹返大約10%。醫生讚我新陳代謝好,復元進展理想,現時傷口已唔再痛,只怕喺人多地方撞到傷口啫。o依家戒埋煙,早睡早起,精神好好,少咗咳,可以一覺瞓到大天光。」

Eric喊住多謝老婆

        小環最記得Eric做手術當日,由4小時等到6個半小時,開始騰雞之際,姑娘上前問:「係咪蔡強榮家屬?醫生打電話上嚟話有嘢講!」她形容如世界末日,即時喊爆,唔夠膽接聽電話,將重責交他親姐,最爆係,電話線路受阻,未講到狀況又cut咗線,原來醫生只想叫家人放心,但成個過程好緊張好驚。大步檻過的Eric輕鬆笑說:「由照到陰影到完事我冇喊過,最多咪死,安排好就冇後顧之憂啦,唯獨有次我望住多謝老婆時就喊咗出嚟!我病咗咁多日,佢朝朝嚟照顧我,患難見真情,當一個人真係有重病時就知道咩人最重要,真係好感動!我覺得連累到家人,有得揀真係唔好再病。(會更愛錫老婆?)哈!一向㗎啦,其實之前我經已愛到佢最盡。戒煙成功係我送畀佢最好嘅禮物。」

病後人生觀變晒

問到患病後,Eric係咪經已將所有物業、保險金、名車、店舖、現金等家產全數轉移老婆名下呢?他自爆:「就算冇呢件事發生所有嘢都畀晒小環,要未雨綢繆唔係有病先安排!」小環強調唔恨做小富婆,反而老公變得忍耐、謙卑,人生價值觀、生活習慣唔同晒,又肯戒煙,呢個係佢最大得着。小環更坦承,Eric病後每天愛他多一些!

採訪:方騫平、梁志明

hd