甜歎麻辣火鍋 老婆叫加辣 郭富城笑口冧妻:加啦!辣死佢!

  52歲嘅天王郭富城,去年4月迎娶較他年輕22歲嘅內地女模方媛,同年9月,Moka為佢誕下女兒Chant,一家三口幸福滿瀉。人父日前開口話恨追個狗年baby,近日已收爐回港慰妻嘅佢,有成兩個月私人時間,大可以積極造人啦!日前晚上,超like食麻辣火鍋嘅城城,同靚老婆穿上黑色情侶裝去銅鑼灣新開嘅星級火鍋店撐枱腳。席間,上海妹郭太叫加辣,天王笑笑口冧妻向店員說:「加啦(加辣)加啦!辣死佢!」鬼馬與愛妻調情!

        自從半年內極速榮升人夫和人父後,城城變得好黐家,仲不時大談妻囡經,100分幸福!好似日前佢出席新春活動時,美魔男就風騷表示已習慣湊女,亦有意再追多一個孩子,直言若自己做到好爸爸嘅榜樣,上天會賜畀佢。

  近日已收爐回港做全職family man嘅城城,3月先開工,大把時間咪湊吓小公主,同陪30歲嫩妻去名店shopping囉!日前晚上9時,有鋪食麻辣火鍋癮嘅人夫就帶太太去銅鑼灣「麻神」歎火鍋。據悉,開業一個月嘅台灣過江龍「麻神」,城城元旦已去過捧場。當晚,佢趁5個月小公主瞓咗,就同老婆穿上黑色情侶裝去二人世界撐枱腳。城城話晒係星級熟客,爆晒場嘅新店都遷就佢哋,請喺屏風後食完嘅客人快啲埋單,然後快快手執好張六人枱,等城城夫婦搭正9點嚟開飯。二人點了安格斯牛排、響鈴、南極冰藻、雜菜拼盤等,還order了鎮店招牌菜果凍鴨血和牛肚。食咗二十分鐘,素顏郭太嫌唔夠辣,就用普通話同丈夫撒嬌嗌加辣,城城即叫店員,然後笑笑口說:「加啦(加辣)加啦!辣死佢!」冧到嫩妻露出心心眼,非常甜蜜!快食個半鐘,二人趕回家湊女就埋單走人,城城戴上口罩眼鏡、Moka亦戴上眼鏡齊齊離開。

採訪 : 張詠森 李維隆

hd