要求送衫唔成 反索償廿萬 55歲苑瓊丹衰格實錄

   55嘅苑瓊丹(苑仔),早年憑《唐伯虎點秋香》中石榴姐一角,返內地食老本掘金,拍戲、真人騷等賺到錢就意氣風發,加上有報道指其富商老公黃乃揚經營玻璃生意身家豐厚,擁有逾2億元物業,黃太更加目中無人。日前,苑仔為賀歲片《西遊記女兒國》接受《東周刊》訪問時就鬧不快。最後更即場睇中件4,000幾蚊外借靚衫,要求記者打電話予贊助送衫,最終傾唔掂數,不滿說:「佢試吓將件衫賣畀第二個,我一定告到佢甩褲,要佢賠番二十萬畀我。」嘩!當中會唔會有咩誤會呀?!

        憑着九十年代在周星馳電影中飾演石榴姐及鴇母等角色,苑瓊丹近年順利在內地發展。早年,苑仔被揭04年秘密下嫁富商黃乃揚,其夫早年在美國留學,係家族第三代接班人。日前,佢接受《東周刊》訪問時,周刊記者就親身見證其難頂惡行。

當記者妹仔

  首先訪問前,苑仔要求記者借衫後要經佢本人過目,記者逐件影相透過宣傳人員send畀苑仔,幾日間都無負面回應。直至訪問當日,苑仔睇到批衫一臉不屑說:「除咗呢件,其他無件得,我只會着呢件影相咋。」然後換上心儀嘅服裝,態度好敷衍咁回答問題,全無真情流露,總之就好hea咁完成訪問。最後,苑仔突然爆一句:「呢件衫我好鍾意,你(記者)叫贊助公司送畀我,我唔除嘞!」續喝令記者說:「唔係deal我,係你deal佢哋呀!」其後贊助公司表示衣服只得一件,原價4千幾,可以半價賣畀苑仔。苑仔要求送免費衫唔成,黑面衝入更衣室換番,再說:「佢試吓將件衫賣畀第二個,我一定告到佢甩褲,要佢賠番二十萬畀我。」真人真事呀!

最新回應

  本報就此事致電苑仔,佢先話聽落「件事」好唔合邏輯,然後逐一解釋:「平時做訪問好少要求着其他品牌嘅衫,咁今次記者話借啲中式衫影相,我預先睇吓係咩衫,都好正常啫!之後我以為件衫係sponsor,想着住走,佢話要買,問完半價都二千幾,唔值囉,咪除番落嚟。然後我再問多次『係咪sponsorO架!係就可以用我張相做宣傳,唔係就唔可以當廣告用途,因為平時咁做,我起碼收人廿萬O架!』係咁嘅意思之嘛!」至於有指訪問內容好Hea,苑仔指當日一口氣連做約十個訪問,「問題如出一轍,答案自然一樣。」最後,佢話可能宣傳人員猛催周刊記者盡快完成,令其不快。


hd