過年前棺材舖主持新節目 譚小環袋定碌柚葉趕衰氣

  去年尾,譚小環老公蔡強榮(Eric)發現患上初期肺癌,手術後已康復,小環宣告全面復工,最近她為奇妙電視主持4月推出的新節目《搵錢男女》,走訪千奇百怪的搵錢生意。過年前更到棺材舖取景訪問年輕殯儀業才俊,入行多年嘅小環百無禁忌,但都有帶埋碌柚葉跟身,拍攝後拍勻全身,無事無事。採訪:方騫平

  年尾流流,譚小環到紅磡一間棺材舖取景,訪問年輕殯儀業務才俊,百無禁忌嘅小環話:「我工作行先,不過都有傳統中國人概念帶埋碌柚葉跟身,待收工由頭抹到尾,咁就精神爽利啦。講起棺材,印象最深刻14年前正值生日拍TVB劇《妙手仁心3》一場瞓棺材戲,好記得瞓喺一副西式棺木,劇情話我蓋住玻璃俾親友瞻仰遺容,拍前我連媽咪都唔敢提好似好大吉利是咁,其實反而係最怕透唔到氣,好彩半小時內順利完成冇焗親,最重要收利是攞番個好意頭啫。」

做主持學到嘢

  提起以前工作,小環講到停唔到,「《妙手3》仲要我黐波膽扮甩頭髮垂危癌症病人,最後都係死。拍戲好玩之處係可以經歷人生冇經歷嘅嘢,而做呢個節目主持就好特別,從新式創業錢途,畀到我創業新貼士,大開眼界,香港人與時並進腦筋轉得好快,好多網上嘢應運而生,連殯儀業都可以透過互聯網揀選啱價嘅『一條龍』服務,我都可以諗吓係咪有嘢可以搞吓先。」

  提到張敬軒開法國餐廳受她啟蒙,小環由藝人變身商業奇才,她大笑說:「呢個光環比港姐更大!多謝軒仔抬舉我,我唔係乜嘢典範,只可以講係行內人跨出一步嘅人辦,我始終相信唔怕辛苦、肯捱、肯做總會成功。」


hd