過年前閃買利是封 小美最愛「笑口常開」

  講起小美,你會即刻諗起郭富城,事實上Wiser打小美兩個字,彈出嚟嘅新聞九成九同城城有關,總之有城城嘅地方就一定有小美,之但係有小美嘅地方就未必有城城。日前晚上,着住件厚羽絨,孭住個厚背囊嘅小美喺銅鑼灣行街,一個人四圍行,見到賣利是封同賀年裝飾嘅店舖就入去兜個圈,望吓揀吓,十幾分鐘就入手印有「笑口常開」字款嘅利是封,盛惠110蚊。採訪:梁志明

  嗱,其實小美係上一代嘅威水填詞人,佢作嘅詞包括羅文嘅《幾許風雨》同譚校長嘅《無言感激》都拎過金曲獎,佢仲拎過最佳填詞人,當年係1987年,係,成31年前,你出咗世未?

原來利是封幾貴

  小美係城城經理人,所以城城有咩事,記者都會搵佢,但據聞小美講嘢都幾倔,簡單講即係唔係幾Nice,但原來佢內心深處唔係咁嘅,仲幾鍾意笑口常開O添。當晚佢去節日限定開設嘅利是封專門店揀利是封,店舖咩款嘅利是封都有,姓氏嘅公仔嘅恭賀字句嘅夾埋幾百款,小美情傾印祝賀字句嘅利是封,見佢拎起「福」字款望吓,再拎起「笑口常開」然後就去畀錢,利是封80蚊25個,110蚊50個,佢畀咗110蚊就離開。




hd