人夫好忙 幫太太夾沙律 張崇基再帶寶貝仔攞棉花糖

  張崇基(Andrew)、張崇德兩兄弟年尾將舉行入行25周年演唱會。仲有大把時間籌備,日前阿哥就趁天寒地凍,一家三口去銅鑼灣食自助韓燒。當晚,見人夫不停替母子燒嘢食,其間又幫太太出去取沙律,櫈未坐暖,乖仔又叫daddy齊齊出去整「朱古力棉花糖」,鬼咁忙,鋼條身形嘅Andrew食得飽唔飽O架?! 採訪 ︰ 梁志明

  48歲嘅張崇基,唔經唔覺同胞弟已入行25年,之不過原來仲有人唔識得分邊個係崇基?邊個係崇德呀?細佬崇德就呻過常被錯認為哥哥崇基,甚至太太劉美娟亦被寫成「張崇基太太」,偏偏從來無人會把張崇基認錯為張崇德!聽講又真係嬲嘅!

  咁大家記清楚,阿哥崇基係高大啲、愛紮馬尾、又係滑水教練、碌lane又好叻嘅!近日忙緊搞搬屋嘅Andrew,日前晚上7時,見佢拖實5歲半寶貝仔張朗翹去百德新街嘅自助韓燒餐廳搵位。兩父子甫坐低就開始食,未幾張太何美寶(Mabel)前來會合,人夫就變得好忙,密密手燒燒燒,餵飽兩位「愛人」先。食至中段,見Andrew衝出去夾沙律,服侍完老婆大人,輪到小王子想食甜品。於是,daddy又拖朗翹出去兜個圈,阿仔發現有「朱古力棉花糖」,嚷着要食,但唔夠高又想自己整喎!Andrew就好細心捉實兒子小手,教佢放入熱鍋,小朋友嚷着要整兩串才肯返位呢!


hd